Оралда жарылыс болған дәмхананы жалға алған кәсіпкер қамауға алынды

Оралда жарылыс пен өрт болған дәмхананы жалға алған кәсіпкер қамауға алынды, деп хабарлайды Azattyq Ruhy облыстық прокуратураның баспасөз қызметіне сілтеме жасап.

Күдіктіге екі және одан да көп адамның өліміне әкеп соқтырған өрт қауіпсіздігі ережелерін бұзды деген айып тағылып, сотқа дейінгі тергеуді басталды. Кәсіпкер уақытша ұстау изоляторына қамалды. Жедел тергеу тобы қажетті сараптамаларды тағайындады.

Айта кетейік, төрт күн бұрын Ризық дәмханасында газ қоспасы жарылып, екі қабатты ғимарат өртенген еді. Үш адам қаза тауып, 6 адам жараланды. Ауруханада жатқан 5 адамның жағдайы әлі ауыр. Қаза тапқан 19 жастағы бойжеткен мен 20 және 32 жастағы екі азаматтың денесі жер қойнына тапсырылды.