ШұғылҚазақстанда өткен тәулікте 1800-ден астам адамнан коронавирус анықталды

Елжан Біртанов қазір коммерциялық құрылымда жұмыс істейді - Алексей Цой

Сот Елжан Біртановтың жұмысқа оралуына рұқсат етті

фотосуретте: Елжан Біртанов, Алексей Цой

Денсаулық сақтау министрі Алексей Цой экс-министр Елжан Біртановтың сотта жұмысқа оралуға рұқсат беру туралы өтінішіне қатысты пікір білдірді.

«Сот Елжан Біртановқа жұмыс істеуге рұқсат етті. Оны денсаулық сақтау министрлігіне немесе жедел жәрдемге қабылдайсыздар ма?», - деп сұрады журналист Цойдан.

«Білуімізше, ол қазір коммерциялық құрылымда жұмыс істейді», - деп жауап берді Алексей Цой.

Еске сала кетейік, 21 сәуірде экс-министр Елжан Біртановқа қатысты қылмыстық іс бойынша алғашқы сот отырысы өтті. Үш жылдан аса уақыт Денсаулық сақтау министрі болған Елжан Біртанов сот отырысында өзінің кінәсіз екенін айтты. Ол өзіне тағылған айыппен келіспейтінін және соттан өзін босатуын сұрады. Тіпті, қамауда отырғанынан гөрі бостандықта жүргені эпидемиямен күресуде қоғамға көбірек пайда әкелетінін жеткізді.

Еске сала кетейік, 2020 жылдың 3 қарашасында бұрынғы Денсаулық сақтау министрі Елжан Біртанов бюджет қаражатын ысырап етті деген күдікпен қамауға алынды.

22 ақпанда Нұр-Сұлтан қаласының ауданаралық тергеу соты экс-министр Елжан Біртановты үйқамақта ұстау мерзімін 2021 жылдың наурыз айының соңына дейін ұзартты. Сосын экс-министрді үйқамақта ұстау мерзімі 30 сәуірге дейін ұзартылды.

Ал, наурыз айының соңында бұрынғы бас дәрігердің қорғаушысы Дмитрий Куряченко БАҚ-қа сұхбат беріп, экс-министр Елжан Біртановтың денсаулығы сыр бергенін айтты. Сондай-ақ адвокат оны үйқамақта негізсіз ұстап отырғанына наразы.

2020 жылдың 25 маусымында Мемлекет басшысының жарлығымен Елжан Біртанов Денсаулық сақтау министрі қызметінен босатылды.

Елжан Амантайұлы Біртанов 1971 жылғы 18 қазанда Жамбыл қаласында дүниеге келді. Алматы мемлекеттік медицина университетін, Аризона штатының университетін, Ресейде дипломнан кейінгі медициналық білім академиясын, Шарите Университеттік клиникасын (Германия), Тұран университетін, Duke University, Fugua School of Business (АҚШ), Global Executive МВА магистратурасын бітірді.

Алматы қаласында жедел медициналық көмек ауруханасының реаниматолог-дәрігері, Республикалық токсикология орталығының басшысы, Денсаулық сақтау министрлігінің бас токсикологы, Денсаулық сақтау министрлігінің «Денсаулық сақтауды дамыту институты» РМК директоры, ҚР Премьер-министрінің кеңесшісі, «Ұлттық медициналық холдинг» АҚ басқарма төрағасының орынбасары, Денсаулық сақтау вице-министрі, «Ұлттық медициналық холдинг» АҚ басқарма төрағасы болып жұмыс істеді.

2014 жылғы мамырдан бастап - Мемлекеттік-жекеменші әріптестік жобаларын сүйемелдеу орталығы басқармасының төрағасы болды. 2015 жылғы 12 қарашадан бастап – Денсаулық сақтау және әлеуметтік даму вице-министрі болды. 2017 жылғы 25 қаңтардан бастап Денсаулық сақтау министрі қызметін атқарды.