Қазақстан мектептерінде 194 дәретхана әлі далада орналасқан

Оқу-ағарту министрі Ғани Бейсембаев мектептерде даладағы әжетханалардың мәселесі қалай шешіліп жатқанын айтты, деп хабарлайды Azattyq Rýhy.

Министр даладағы дәретханалар саны өткен жылдармен салыстырғанда әжептәуір азайғанын атап өтті. Бірақ оларды толығымен жою үшін әкімдік қосымша қаражат бөлуі керек.

«Біз жылы дәретханалар мен даладағы әжетханалар бойынша жыл соңына дейін жоспар құрдық. Даладағы әжетханалардың саны 194 болып шықты. Олар жабылған, жұмыс істемейді деп баяндалған еді. Қазір біз оларды толығымен сүріп тастауды талап етіп отырмыз. Жыл соңына дейін бұл дәретханалар бұзылады деп ойлаймын, осылайша бұл мәселеге нүкте қоямыз», - деді Бейсембаев Үкіметте өткен баспасөз мәслихатында.