Нью-Йоркке тікелей ұшу үшін қазақстандықтар әлі екі жыл күтуге мәжбүр болады
АҚШ өкілетті органдары Қазақстанға келіп аудит өткізуі керек
Бұған дейін үкіметтегі шенеуніктер Қазақстан мен АҚШ арасын жалғайтын тікелей рейстер 2024-2025 жылдары ашылуы мүмкін екенін мәлімдеген. Алайда отандастарымызға әлі екі жыл тура күтуге тура келеді. Азаматтық авиация комитеті төрағасының орынбасары Дархан Қатышев Azattyq Rýhy тілшісіне берген сұхбатында Air Astana-ның Нью-Йоркке тікелей рейстері тек 2026 жылы басталатынын айтты.
«Әуе компанияның жоспары бойынша Нью-Йоркке ұша алатын ұшақтарды тек 2026 жылы сатып алады. Яғни әлі екі жыл бар. Мәселе бір ғана ұшақта емес, АҚШ-тың авиацияны қадағалайтын екі органы елімізде аудит өткізеді. Олар бізге комиссия жіберіп, әуе компаниясын, Азаматтық авиация комитетін, Қазақстанның авиация әкімшілігі мен рейс орындалатын әуежайды тексереді. Олар әлі бізге келген жоқ», - деді Қатышев үкімет кулуарында.
Оның айтуынша, тамыз айының соңында АҚШ-тан алдын ала тексеріс жүргізетін топ келеді.
«Америкаға рейс жасайтын кемі екі ұшақ сатып алуымыз керек. Air Astana сол ұшақтарды сатып алуға үкіметтен ақша сұрап отыр. Оларға нақты қанша керек екенін білмеймін. Ал алыс қашықтыққа қатынайтын бір ұшақтың құны шамамен 500 млн доллар болады. Ұшақтар өте қымбат. Алайда әуе компаниясы ақша сұраса да, сұрамаса да үкіметтен ештеңе бөлінбейтін шығар. Себебі Эйр Астана оларды өз есебінен сатып алуы керек»,- деп түсіндірді комитет төрағасының орынбасары.
Осылайша аудиттен өтіп, ұшақтар сатып алынғаннан кейін ғана Нью-Йоркке тікелей рейстер жасалады. Қатышевтің айтуынша, жоспар бойынша рейстер 2026 жылы іске қосылмақ.
