Қазақстанда коронавирустан жазылғандар саны 80-нен асты

Шымкентте екі адам, Алматыда тоғыз адам, Жамбыл облысында екі адам коронавирус індетінен жазылды, деп хабарлайды Azattyq Rýhy тілшісі. Қазақстан бойынша жазылғандар саны 81-ге жетті.

Алматыда жазылып шыққандардың ішінде 5 әйел, 1 ер адам және кәмелеттік жасқа толмаған 3 бала бар.

«Олардың төртеуі 27 наурызда Санкт-Петербургтен, екеуі 24 наурызда Дубайдан және Мәскеуден, біреуі 20 наурызда Ыстамбул-Тбилиси - Алматы чартерлік рейсімен ұшып келген және екеуі инфекция жұқтырған адаммен байланыста болғандар қатарынан», -  деді Алматы қаласы Қоғамдық денсаулық басқармасының басшысы Тілеухан Әбілдаев.

Олардың емдеу мерзімі орта есеппен 16-18 күнге созылған. Олар енді 14 күндік үй карантинінде бақылауда болады.

Бүгінгі күні Алматыда қауіпті індеттен  жазылған адамдардың саны 37 жетті. Ал Нұр-Сұлтанда – 34, Шымкентте – 2, Ақтөбе облысында – 1, Алматы облысында –1, Жамбыл облысында – 3, Қарағанды облысында – 1, Павлодар облысында – 1, Солтүстік Қазақстан облысында 1 адам жазылып шықты.