Оңтүстіктен солтүстікке көшкен тұрғындарға мемлекет тарапына қолдау жалғасады – Мемлекет басшысы

Еліміздің оңтүстігінен солтүстік облыстарға көшкен қандастардың құқығы бұзылмай, оларға мемлекет уәде еткен жағдайдың бәрі жасалуы тиіс. Бүгін Ұлттық сенім кеңесінің кезекті отырысына төрағалық еткен Мемлекет басшысы Қасым-Жомарт Тоқаев осылай деді. Президент қоныс аударушыларға берілетін баспана мен жәрлемақыға қатысты Үкіметке тапсырма берді.

Еске салайық, бұған дейін Солтүстік Қазақстан облысы Аққайың ауданына қарасты Астраханка ауылының бір топ тұрғыны шу шығарған болатын. Олар мемлекеттік бағдарлама аясында оңтүстіктен солтүстікке көшіп келген. Алайда, әкімдік жұмыс тауып бермегені өз алдына, берген баспанасында өмір сүру мүмкін емес дейді олар. Ал, аудан әкіміне базынасын айтып барғанда, шенеунік оларға оңтүстікке кері көшуге кеңес берген. Azattyq Ruhy тілшісі аталған жайт туралы жазғаннан кейін ғана қоныс аударған қандастардың мәселесі оң шешімін таба бастады.

Жалпы, солтүстік облыстарға көшіп барған оңтүстікқазақстандық тұрғындар тарапынан соңғы уақытта шағым жиі айтыла бастады. Бүгін Қасым-Жомарт Тоқаевтың осы мәселеге ерекше тоқталғаны да содан. Президент қоныс аударушыларға берілетін жәрдемақы көлемін екі есе арттыруды Үкіметке тапсырды.

«Ел ішіндегі миграциялық үдерісті реттеу ісінің тиімділігін арттыру қажет. Әсіресе, бұл ел азаматтарын еліміздің оңтүстігінен солтүстігін көшіруге қатысты. Аталған мәселе Ұлттық кеңесте бірнеше рет көтерілді. Оны кешенді түрде шешу үшін, біріншіден, электронды еңбек биржасының базасында бірыңғай ақпараттық ресурс құру қажет. Көшіп барушылар мемлекеттен көрсетілетін қолдау туралы  ақпаратты тікелей алуы қажет. Екіншіден, көшуге қатысты мәселені жеңілдеткен жөн. Мемлекет мигранттарға барынша қолайлы жағдай жасауы тиіс. Жақында мен жұмыс сапарыммен Солтүстік Қазақстан облысында болдым. Бұл өңір демографиялық өсімі ең баяу аймақтың бірі болғанымен, қоныс аударушыларды тарту жағынан жақсы нәтиже көрсетіп отыр. Мигранттарды ынталандыратын қосымша шара ретінде, оларға берілетін жәрдемақыны екі есеге, яғни, 35 айлық есептік көрсеткіштен 70-ке дейін көбейткен жөн деп санаймын. Үкіметке бір айдың ішінде осы мәселені зерттеп, тиісті шешім қабылдауды тапсырамын», - деді Мемлекет басшысы.

Сонымен қатар, олардың баспана мәселесі де Ұлттық кеңестің отырысында сөз болды. Қасым-Жомарт Тоқаев солтүстік өңірге қоныс аударған қандастар «қандас мәртебесінің» мерзімі аяқталғаннан кейін де үй алу құқын сақтай алатынын мәлім етті. 

Мемлекет басшысы аталған шара шетелден оралған қандастарымыздың жұмыс күші тапшы солтүстік өңірге қоныс аударуына ықпал ететінін жасырмады. 

«Ата жұртқа оралған қандастарды тұрғын-үймен қамтасыз ету  мәселесі де толық шешілген жоқ. Олардың  бір жылға берілетін қандас мәртебесінің мерзімі аяқталғанша ғана үй алуға мүмкіндіктері бар, ал азаматтыққа ие болған соң бұл мәртебе жойылып, үй алу құқынан бірден айырылады. Осыған орай, азаматтық алған қандастарымыз солтүстікке көшсе, үкімет олардың үй алу кезегінің сақталуын қамтасыз етуі керек.  Бұл шара қандастардың осындай жұмыс күші тапшы аймақтарға көшіп баруына қосымша серпін береді», - деді Президент.

Айта кетейік, оңтүстіктен солтүстікке қоныс аудару бағдарламасы 2015 жылдан бері жүзеге асып келеді. Басты мақсат – халқы аз өңірлерді жұмыс күшімен қамтамасыз ету.