Жаңа оқу жылында «кезекші сыныптардың» қандай тәртіпте оқитыны белгілі болды

Білім және ғылым министрі Асхат Аймағамбетов жаңа оқу жылының бірінші тоқсанында дәстүрлі форматта мектепке баратын «кезекші сыныптардың» қандай тәртіпте оқитынын түсіндірді,  деп хабарлайды Azattyq Rýhy тілшісі. 

«Кезекші сыныптар» деген енгізілді. Бастауыш сыныпта (1-4 сынып) оқитын баласы бар ата-ана баласын дәстүрлі түрде мектепте оқытуға өтініш бере алады. Мұндай жағдайда санитарлық-эпидемиологиялық талаптар қатаң сақталуы керек. І тоқсанда дәстүрлі форматта оқитын сыныптағы кабинетте 10-15 баладан артық отырмауы керек. Яғни бір сыныптың өзі топтарға бөлінеді. Осы сыныптарға қоңыраулар әртүрлі уақытта соғылады. Балалардың дене қызуы тұрақты түрде өлшеніп, балалардың денсаулығы қатаң бақылауға алынады. Ата-аналарға мектеп аумағына кіруге тыйым салынады. Дәстүрлі форматта оқытуға болады деген күннің өзінде сабақтың жартысы қашықтан оқыту форматына ауыстырылады. Мысалы, ағылшын тілі мәселен қашықтан оқытылады», - деді министр. 

Ол І тоқсанда дәстүрлі форматта оқитын балалар үшін мектептегі асхана жұмыс істемейтінін атап өтті.