Түркия жасағы мен Ресей еріктілері Таулы Қарабаққа баруға дайын

Ресей мен Түркиядан Таулы Қарабаққа әскери күштер жөнелтіледі деп жоспарлануда. Бұл туралы Azattyq Rýhy тілшісі «Подъем» басылымына сілтеме жасап хабарлайды. 

Армяндар одағының президенті Ара Абрамян Таулы Қарабақта қазір болып жатқан жағдай «Әзірбайжан мен Түркияның жоспарланған ауқымды акциясы» деп мәлімдеді.

«Бұл – қандай да бір садизм, бандитизм, терроризм. Олар Қарабақта бірде-бір армянның болмауын қалайды. Армян жоқ, армян мәселесі жоқ. Ол үшін олар коронавирусты қолданады. Ұшақтар жоқ, көмек, тіпті, гуманитарлық көмек жіберу мүмкін емес. Қазір бізде бір түнде 20 мың еріктінің тізімі жиналды, біз әскери көліктерден адамдарды сол жерге жіберуді сұраймыз. Тағы бірнеше жүз, мыңға жуық орыс ұлтының өкілдері кішкентай Қарабақты қорғауға ерікті түрде баруға дайын екендерін айтты. Бірақ біз рахмет дедік», - деді ол.

Армяндар одағы Владимир Путинге жанжалды тоқтатуға көмектесу туралы өтінішпен жүгінуге ниетті.

Өз кезегінде, WarGonzo Telegram каналына сілтеме жасай отырып «Рамблер» ақпарат агенттігі, «Командос бригадасы» элиталық арнайы күштері Түркиядан Әзірбайжанға жөнелтілуге дайындалып жатыр деп хабарлайды.

Стамбул дерек көздері Түркияның тұрақты әскерлері және арнайы күштері «әзірбайжан-армян майданындағы операцияға қатысуы мүмкін» деген ақпаратты жазып жатыр.

Еске сала кетейік, Армения мен Әзірбайжан арасындағы қатынастардың шиеленісуі 27 қыркүйекте болды. Таулы Қарабақта ұрыс қайта басталды. Қақтығыс тараптары бір-бірін шекаралас аудандардағы позицияларға оқ жаудырды деп айыптады және соғыс жағдайын енгізді. Әзірбайжан билігінің мәліметінше, Армения Қарабақ байланыс желісіндегі елдімекендерге оқ атқан, азаматтық және әскери адамдар арасында қаза тапқандар бар. Алайда Армения Қорғаныс министрлігі бірінші болып Әзірбайжан Қарабаққа әуе және зымыран шабуылдарын ұйымдастырды дейді. Аймақта соғыс жағдайы жарияланды.