Ақмола облысында полицейлер 1400 көлікті алып жүрді
Жолдағы қауіпсіздікті патрульдік полиция қамтамасыз етті
Астана–Қарағанды және Астана–Павлодар бағыттарында қозғалыс уақытша шектелген кезде тәртіп сақшылары жүргізушілердің қауіпсіздігін қамтамасыз етті. Ақмола облысында полицейлер 1400 көлік колоннасын ауа райының қолайсыз кезінде сүйемелдеп өтті. Бұл туралы ІІМ баспасөз қызметі мәлімдеді, деп хабарлайды Azattyq Rýhy.
Министрліктің мәліметінше, жол қозғалысына шектеу қойылған Астана–Қарағанды және Астана–Павлодар бағыттарында патрульдік полиция қызметкерлері 350 жүк көлігі мен 1050 жеңіл автокөліктен құралған колоннаны қауіпсіз аймаққа дейін жеткізді.
Полицейлер ескерту жасаса да, кей жүргізушілер тәуекелге барған
Құқық қорғау органдарының өкілдері бірнеше мәрте ескерту жасағанына қарамастан, кейбір жүргізушілер қолайсыз ауа райына қарамай жолға шыққан.
Полиция мұндай әрекеттердің адам өміріне қауіп төндіретінін және ауыр салдарға әкелуі мүмкін екенін еске салды.
«Ауа райының нашарлауына байланысты қозғалысқа шектеу енгізілген кезде жолға шығудан бас тартқан жөн. Ескертуге құлақ аспау қайғылы оқиғаларға себеп болуы мүмкін», – деп атап өтті полиция департаменті.
Тәртіп сақшылары тәулік бойы кезекшілікте
ІІМ өкілдері қолайсыз ауа райы кезінде республикалық маңызы бар жолдарда тәулік бойы кезекшілік ұйымдастырылғанын, сондай-ақ патрульдік полиция жүргізушілерге қауіпсіз бағыттар мен ауа райы туралы ақпаратты жедел жеткізіп отыратынын хабарлады.
