ШҚО-да ер адам көрші ауылдағы сүйіктісіне барамын деп түрмеден бір-ақ шықты

Шығыс Қазақстан облысында 37 жастағы ер адамға қатысты сот үкімі күшейтілді. Ол пробация талаптарын сақтамай, қадағалаушы органдардан жасырынғаны үшін бостандығынан айырылды, деп хабарлайды Azattyq Rýhy.

Төрт айды күтпей, ауылдан қашып кеткен

Алтай ауданында пробация бақылауында болған азаматқа жаза мерзімінің аяқталуына небәрі 4 ай қалған еді. Алайда ол ешкімді ескертпестен ауылдан шығып, екі апта бойы көрші елді мекенде сүйіктісімен болған. Осы уақытта ол пробация қызметінің қоңырауларына жауап бермей, қызметтік нөмірлерді тіпті бұғаттап тастаған.

Қатаң шешім қабылданды

Ер адам 15 күннен кейін өз еркімен келгенімен, бұл кеш болды. Пробация қызметі заңға сәйкес материалдарды сотқа жолдады. Нәтижесінде шектеулі бостандық жазасы түрмеге ауыстырылды.

Қылмыстық-атқару жүйесі департаментінің ескертуі

«Оған сенім артылды, бірақ ол соттың талаптарын елеген жоқ. Бұл – саналы түрде жасалған әрекет. Сондықтан ең қатаң шара қолданылды», – деді Алтай аудандық пробация қызметі №2 бөлімінің бастығы Маржан Батырханова.

Енді ер адам жазасын колонияда өтейтін болады. Ведомство мұндай жағдай басқаларға сабақ болуы тиіс екенін атап өтті.