Қытай компаниясы Алматыда алғашқы қалдықтарды қайта өңдеу зауытын салады

Алматыда еліміздегі алғашқы энергетикалық қалдықтарды кәдеге жарату зауыты салынады, деп хабарлайды Azattyq Rýhy Экология және табиғи ресурстар министрлігіне сілтеме жасап.

Инвестициялар туралы келісімге министр Ерлан Нысанбаев пен қытайлық «Junxin Environmental Protection (Almaty)» ЖШС басшылығы қол қойды.

2024 жылы компания Қытайда 3,2 млн тонна тұрмыстық қалдықты қайта өңдеп, 1,473 млрд кВт. сағ электр энергиясын өндірген.

«Сондай-ақ компанияның 400-ден астам патенті бар (оның ішінде токсиндерді, фильтраттарды, тамақ өндірісінің қалдықтарын кәдеге жарату саласында). 2024 жылдан бастап компания халықаралық қатынасты белсенді түрде арттыруда, бұл ретте Орталық Азия елдеріне, атап айтқанда Қырғызстандағы 3 жобаға ерекше назар аударылуда», - деп жазылған хабарламада.

Зауытқа 145 млрд теңге инвестиция тартылып, тәулігіне кемінде 1600 тонна қалдық өңдеп, қуаты 60 МВт электр энергиясын өндіру жоспарланып отыр.

«Құрылыс кезеңінде кемінде 700 уақытша жұмыс орнын, кәсіпорын іске қосылғаннан кейін кемінде 120 тұрақты жұмыс орнын ашу жоспарланған. Жергілікті кадрларды ҚХР-ға іссапарға жіберіп, тұрақты түрде оқытып отыру көзделіп отыр», - дейді ведомство.

Айта кету керек, қалдықтарды энергетикалық кәдеге жарату –  Экологиялық кодексте қалдықтарды басқару саласын дамытудың негізгі бағыттарының бірі.

«Hunan Junxin Environmental Protection» – қатты тұрмыстық қалдықтарды, соның ішінде термиялық өңдеу, электр энергиясын өндіру және ресурстарды қайта пайдалану саласындағы экологиялық қауіпсіз шешімдерге маманданған қытайлық жеке компания. Ол 2011 жылы құрылған.