Жаңаөзен тұрғыны жүрегіне жасалған отадан кейін ауыр халде жатыр: туыстары хирургты айыптады

Жаңаөзен тұрғыны жүрегіне жасалған отадан кейін ауыр халге түсті. Туыстары хирург барлық протоколды бұзып, наркозсыз жасалғанын алға тартып отыр, деп хабарлайды Azattyq Rýhy агенттігі Lada.kz-ке сілтеме жасап.

Қаныбек Құлжановтың отбасы дәрігерді немқұрайлылыққа жол берді деп айыптап, оны қылмыстық жауапкершілікке тартуды талап етуде. Тамыз айының басында науқас санавиация арқылы Бейнеуден облыстық көпсалалы ауруханаға жеткізіліп, оған аортокоронарлық шунттау жасалған. Ота 7 тамызда өтті, алайда одан кейін ер адам жансақтау бөліміне ауыр жағдайда түскен.

Науқастың жұбайы Роза Дыбыстың айтуынша, отбасы операция кезіндегі шок туғызған жайттарды операциялық бөлмеде жасалған аудиожазбадан білген.

«Көп болса Маңғыстаудың бір адамы өледі. Одан не болыпты?» – деген хирургтің сөзін келтіреді Роза Дыбыcова.

Оның сөзінше, кардиохирург анестезиологтың нұсқауын елемей, наркозсыз әрекет жасаған және салдарынан науқас 2,5 литр қан жоғалтқан.

Кардиохирург өз кінәсін мойындап, кешірім сұрап, қызметінен кету туралы арыз жазған. Алайда отбасы мұны жеткіліксіз деп санап, жазалауды талап етіп отыр.

«Мен күйеуімнің сауығып кетуіне барынша көмек көрсетулеріңізді сұраймын. Ол әлі де реабилитацияны қажет етеді. Ең бастысы, істі «адам өлтіруге қасақана оқталу» бабына қайта саралауды өтінемін», – деді науқастың жұбайы.

Өңірлік денсаулық сақтау басқармасы оқиға бойынша тергеу басталғанын растады.

«Қылмыстық іс қозғалды, тергеу жүргізілуде. Пациенттің жағдайы тұрақты ауыр: ол реанимация бөлімінде, есін біледі және дәрігерлердің бақылауында», – деді Маңғыстау облыстық көпсалалы ауруханасының баспасөз хатшысы Жұлдызай Қалиева.