Ақтау тұрғынынан Қызыл кітапқа енген 40 келі балық тәркіленді

Маңғыстау облысының тұрғынынан бекіре тұқымдас балықтар тәркіленді, деп хабарлайды Azattyq Rýhy.

Ішкі істер министрлігі ведомстволық сайтының мәліметінше 28 тамызда Ақтау қаласының 26-шағынауданында ұйымдасқан қылмысқа қарсы күрес басқармасының қызметкерлері «Құқықтық тәртіп» жедел-профилактикалық іс-шарасы аясында сирек кездесетін балық түрлерін заңсыз иемдену дерегі анықталған.

Тексеру барысында азаматтан бекіре тұқымдас 12 балық (бастары бар, ішкі мүшелерінсіз, жалпы салмағы 41 келі 30 г) тәркіленді.

«Аталған дерек бойынша ҚР Қылмыстық кодексінің 339-бабы 1-бөлігімен (Жойылып кету қаупi төнген, сирек кездесетiн, сондай-ақ пайдалануға тыйым салынған өсiмдiктер немесе жануарлар түрлерiмен, олардың бөліктерімен немесе дериваттарымен заңсыз айналысу) сотқа дейінгі тергеп-тексеру амалдары басталды», - деп жазылған хабарламада.

Мұндай құқық бұзушылықтар экологиялық заңнаманы бұзып қана қоймай, табиғатты, құнды табиғи нысандарды қорғауға және орнықты құқықтық тәртіпті қамтамасыз етуге бағытталған «Заң мен тәртіп» мемлекеттік қағидатына қайшы келеді.

Қазіргі уақытта сараптама тағайындалып, қажетті тергеу-жедел шаралары жүргізілуде. Сотқа дейінгі тергеп-тексеру ісін Ақтау қалалық полиция басқармасының тергеу бөлімі жүргізіп жатыр.