Павлодар облысында ғұндар кезеңіне тиесілі жәдігерлер табылды
Қазақстан мен Ресей ғалымдары IV-V ғасырларға жататын сирек жәдігерлерді анықтады
Павлодар облысында ерте орта ғасыр кезеңіндегі қорымдарды зерттеу кезінде қазақстандық және ресейлік археологтар ерекше қорым тапты, деп хабарлайды Azattyq Rýhy.
Байпық ескерткіші – басты зерттеу нысаны
Зерттеу жұмыстары Алтай мемлекеттік университетінің қатысуымен өтті. Экспедицияның басты назары Байпық деп аталатын жаңа археологиялық ескерткішке ауды.
Ол Кривинка ауылынан 9 шақырым жерде, Ертіс өзенінің оң жағалауындағы Семияр-Кривинка археологиялық кешенінің құрамында орналасқан.
Бұл нысанды бірнеше жыл бұрын павлодарлық ғалым Виктор Мерц ашқан.
Дала дүмпуі: Ерте темір дәуірінің қорымы табылды
Ескерткіш Ертіс жайылмасының террасасында орналасқан құмды дөң түрінде. Кеңес дәуірінде бұл жер егістікке пайдаланылып, жыртылғандықтан, көне құрылымдар ішінара бұзылған.
Алайда экспедиция мүшелері IV-V ғасырларға тиесілі, Халықтардың Ұлы қоныс аудару дәуірінен қалған тұтас жерлеу орнын тапты.
Атпен бірге жерлеу рәсімі жасалған
Қорымнан адам сүйектері мен жылқы терісінің қалдықтары (басымен және тұяғымен), сондай-ақ сол дәуірдің қару-жарақтары табылды.
Анықталған заттар:
- сүйектен жасалған садақ қаптама бөліктері;
- темір жебе ұштары;
- қорамса ілгегі;
- темір белдік ілгегі;
- пышақ;
- темір ауыздықтар.
Ғұн мәдениетінен сыр шертетін түйіншек табылды
Экспедиция жетекшісі, профессор Сергей Грушин ерекше жәдігер ретінде полихромды стильде жасалған күміс түйіншекті атап өтті.
«Бұл зергерлік бұйым ұсақ тастармен және жартылай қымбат тастармен әшекейленген. Тастың нақты түрін анықтау үшін минералогтардың көмегі қажет. Мұндай жерлеулер Шығыс Қазақстан аумағында сирек кездеседі. Бұл стиль ғұн дәстүрлерімен тікелей байланысты», – деді ол.
VIII-IX ғасырларға жататын түркілік қорым да зерттелді
Экспедиция барысында VIII-IX ғасырларға жататын, яғни түркі дәуіріндегі тағы бір қорым зерттелді. Онда да адам мен ат бірге жерленген, алайда бұл қорым бұзылған болып шықты.
Айналада темір пышақ сынықтары, жебе ұштары, сауыт бөліктері және басқа да темір заттардың қалдықтары табылған.
