Энергетика министрлігі 1 тамыздан бастап сұйытылған газ бағасын көтеруді ұсынып отыр

Қазақстанның Энергетика министрлігі бөлшек саудада, тауар биржаларынан тыс сатылатын сұйытылған мұнай газының шекті бағасын көтеру туралы бұйрық жобасын әзірледі, деп хабарлайды Azattyq Rýhy.

Тұтыну көлемі өсіп жатыр

Құжат 18 шілдеде «Ашық НҚА» порталында қоғамдық талқылау үшін жарияланды.

Энергетика министрлігі Қазақстанда 1 тамыздан бастап сұйытылған мұнай газының бағасы түзетілетінін хабарлады.

«Бағаны түзету қажеттілігі сұйытылған мұнай газын өндірудің шығындылығының сақталуымен байланысты. Қазіргі таңда СМГ өндірудің өзіндік құны тоннасына 70–80 мың теңге аралығында болса, ал зауыттар үшін белгіленген шекті көтерме баға тоннасына 51 932 теңге деңгейінде қалып отыр.

Осыған байланысты өңдеуші кәсіпорындарда жаңғырту және жоспарлы жыл сайынғы жөндеу жұмыстарын жүргізуге қаражат тапшылығы жинақталып жатыр. Мұндай жағдайда сұйытылған газды өндіруге қызығушылық төмендейді, зауыттар едәуір тиімдірек өнім өндіруге көшуді жөн санайды, бұл ішкі сұранысты толық қанағаттандыруға қауіп төндіреді», - деп түсіндірді Энергетика министрлігі.

Ведомство Қазақстанда сұйытылған мұнай газының тұтыну көлемі тұрақты түрде өсіп келе жатқанын атап өтті – 2022 жылы 1,8 млн тонна болса, 2024 жылы 2,4 млн тоннаға дейін жеткен.

Аналитиктердің болжамы бойынша, 2025 жылы ішкі нарықтағы тұтыну көлемі тағы 200 мың тоннаға артып, 2,6 млн тоннаны құрайды. Бұл ретте газ тапшылығы 30–40% деңгейінде болуы мүмкін.

Шекті бөлшек баға 7–10 теңгеге қымбаттайды

Министрлік Қазақстандағы сұйытылған мұнай газының бағасы ТМД елдері арасында ең төмен деңгейде қалып отырғанын еске салды.

«Бұйрық жобасына сәйкес, СМГ-ға шекті көтерме баға тоннасына  51 932 теңгеден 59 722 теңгеге дейін көтеріледі. Аймақтық ерекшеліктерді ескере отырып, шекті бөлшек баға 7–10 теңгеге артады. Бұл шара ішкі нарықты толық көлемде қамтамасыз етуге, сондай-ақ газ өңдеу саласына инвестиция тартуға қолайлы жағдай жасауға бағытталған», - деп жазылған бұйрық жобасында.

Министрліктің мәліметінше жобаны қабылдау әлеуметтік-экономикалық, құқықтық және (немесе) өзге де жағымсыз салдарларға әкеп соқпайды.

Жоба 23 шілдеге дейін «Ашық НҚА» порталында қоғамдық талқылауда болады.