Жасөспірімдер дауы: Ақтауда мектеп оқушысының көзіне оқ тиген

Кинотеатрдан шыққан жасөспірімдерге шабуыл жасаған

Ақтау қаласында жасөспірімдер арасында жанжал болған. Кешкі уақытта достарымен кинотеатрдан шыққан 11-сынып оқушысының бетіне пневматикалық қарудан оқ атылған. Бұл жайттан кейін бір көзі көрмей қалған бозбаланың болашағы бұлыңғыр болып отыр. Оның ата-анасы қылмыскердің әділ жазалануын талап етеді, деп хабарлайды Azattyq Rýhy Almaty.tv сайтына сілтеме жасап.

«Бәрі тұман сияқты болды…»

Жәбірленуші болған жағдайды еске алып, қиындықтарын жеткізді.

«Досым мені жетектеп алып кетті. Сол сәт есімде жоқ, бәрі тұман секілді болды. Достарымның айтуынша, бізге 5-10 адам тап берген. Бетімнен пневматикалық тапаншамен атқан. Қазір мен бір көзіммен ғана көремін. Бұл – күнделікті өміріме үлкен кедергі», – дейді оқушы.

Бірнеше ота жасалды

Жасөспірім ұшқыш болуды армандаған. Алайда алған бет сүйегі жарақаты мен көру қабілетінің бұзылуы салдарынан медициналық комиссиядан өте алмай, армандаған мамандығына бара алмады.

Анасы Мадина Рысмағанбетова оқиғадан кейін ұлының жағдайы өте ауыр болғанын айтады.

«Бастапқыда ештеңе білмедік. МРТ-дан кейін ғана ішкі жағында оқ барын көрдік. Дереу операцияға апардық. Содан кейін полицияға жүгіндік. Балам: «Анашым, көзім қалай?» деп сұрай берді. Жүрегім ауырды. Оны «бәрі жақсы болады» деп жұбаттым», — дейді ол.

Қылмыстық іс қозғалды, бірақ үкім жоқ

Маңғыстау облыстық полиция департаментінің хабарлауынша, бастапқыда іс ҚР ҚК 99-бабы («Кісі өлтіруге оқталу») бойынша тіркелген. Кейін ол 106-бапқа («Денсаулыққа қасақана ауыр зиян келтіру») қайта сараланды. Күдікті – кәмелет жасына толмаған жасөспірім. Қазір ол қаладан шықпау туралы қолхатпен босатылған. Тергеу әлі жалғасып жатыр.

Отбасы әділ үкім күтеді

Жәбірленушінің отбасы кінәлілерге қатаң жаза берілуін сұрайды. Анасының айтуынша, олар ешкімді кешірмек емес, себебі баласының болашағы қирады.

«Ұлымның тағдырымен ойнағандарды жазасыз қалдырмау керек. Біз әділеттілікке қол жеткіземіз»,– деді анасы.

Контекст

Айта кетсек, бұған дейін Ақтауда ер адам баласын қатарласымен төбелестіріп, камераға түсіргені хабарланған еді. Ал одан бұрын Шығыс Қазақстан облысында мектеп оқушылары арасындағы төбелестен кейін қылмыстық іс қозғалды. Сонымен қатар Атырау қаласының іргесінде орналасқан Еркінқала ауылында бір топ мектеп оқушысы 8-сыныпта оқитын оқушыларды сабақтан шыққан соң жұмыс істеуге келмегені үшін таяқпен ұрып, соққыға жықты.

Сондай-ақ Алматыда жабылып қызды сабаған видео тарады. Жәбірленуші достарымен сауда орталығына барған кезде мектептегі таныстарымен кездесіп, олардың арасында жанжал туындаған.