Қазақстан азаматы Сирияда жүріп, терроризмді насихаттағаны үшін 7 жылға сотталды
Ол 2017 жыл мен 2018 жыл аралығында Сирия Араб Республикасында болған
Қазақстан азаматы Сирияда жүріп, терроризмді насихаттағаны үшін 7 жылға сотталып кетті, деп хабарлайды Azattyq Rýhy.
Жезқазған қалалық сотында телекоммуникация желілерін пайдаланыла отырып, терроризмдi насихаттау, сол сияқты көрсетілген мазмұндағы материалдарды тарату мақсатында сақтау және тарату бойынша сотқа берілген «Б.»-ға қатысты қылмыстық іс қаралды (ҚК 256-б. 2-б.)
Ол 2017 жыл мен 2018 жыл аралығында Сирия Араб Республикасында бола тұра, «Telegram» месенджері бойынша ойдан шығарылған аккаунт арқылы Ұлытау облысы, Сәтбаев қаласында тұратын жақын туысқанымен хат алмасып, терроризмді насихаттаған, ұялы телефонында терроризмді насихаттау белгілері бар радикалды діни материалдарды тарату мақсатында сақтаған, таратқан.
Прокурор сотталушыны тағылған айып бойынша кінәлі деп танып, оған 7 жылға бас бостандығынан айыру жазасын тағайындауды сұрады.
«Сотталушы тағылған айып бойынша кінәсін толық мойындап, жасаған әрекеттеріне шын ниетпен өкінетіндігін көрсетті, оған қатысты жазаны жеңілдетіп, бас бостандығынан айырмауды сұрады. Сот талқылауы барысында сотталушының кінәсі сотқа ұсынылған дәлелдемелердің жиынтығымен дәлелденді.
Жезқазған қалалық сотының үкімімен «Б.» ҚК-нің 256-б. 2-б. бойынша кінәлі деп танылып, оған 7 жыл мерзімге бас бостандығынан айыру жазасы тағайындалды, жазаны қылмыстық-атқару жүйесінің орташа қауіпсіз мекемесінде белгіленді», - делінге облыстық сот хабарламасында.
Сотталғанның кәмелетке толмаған балаларына қамқорлық белгілеу сұрағын шешу қамқоршылық және қорғаншылық органына берілді.
Үкім заңды күшіне енген жоқ.
