Ақтөбеде шу шықты: бір күнде 350 студент оқуынан қуылды
Олар енді келісімшарт бойынша сотқа жүгінетін болды
Ақтөбеде Халықаралық қазақ-орыс университетінің басшылығы бір күнде 350 студентті оқудан шығарып жіберген, деп хабарлайды Azattyq Rýhy.
Студенттер үшін бұл жаңалық төбеден жай түскендей болып отыр. Олардың оқудан шығарылғаны туралы бұйрық 18 наурызда шыққан. Алайда оны білім алушылар тек 26 наурызда ғана алған. Оған дейін ешқайсысына ескерту берілмеген. Қазіргі кезде студенттер мен ата-аналар министрліктен көмек күтуде.
«Кураторым айтты, «Платонус» платформасы арқылы сабағыңызды оқып отырасыз. Ешқайда келмейсіз деді. Солай мен сабағымды жауып, оқып отырдым. Екі жыл бойы ақша төледім. Аяқ астынан сабаққа келмегенсіз дейді. Негізі келісімшартта бәрі жазылған, қашықтан оқыту деп тұр», - дейді 2-курс студенті Құралай Құрман.
Студенттердің көбі келісімшарт бойынша қашықтан оқиды. Жыл сайын оқу ақысына 500 мың теңгеге дейін ақша төлейді. Білім алушылар сабаққа барған күннің өзінде оқытушылардың өздерін ешқашан таба алмаймыз, дейді.
«Оның 91 білім алушысы оқу ақысын төлемеген, қалған 259-ы – сабаққа мүлдем қатыспаған студенттер. Қашықтан дегенде білесіз ғой міндетті түрде университетпен байланыс болу керек. Яғни ол студенттер университетпен ешқандай байланыста болмаған», - дейді Залықаралық қазақ-орыс университетінің бөлім басшысы Ақнұр Қәдірбек.
Дегенмен ата-аналар мен студенттер бұл пікірмен түбегейлі келіспейді. Университеттегі оқытушылар құрамы толық емес, соның салдарынан көптеген пән талапқа сай оқытылмайды, дейді. Білім ордасындағы бұл даулы жағдай облыс әкімдігі мен министрлікке дейін жетті.
«Ата-аналармен, студенттермен кездесу барысында қолдарында келісімшарттары бар екені белгілі болды. Соның аясында сотқа жүгіну қажеттілігі түсіндірілді. Әрі қарай мәселені бақылайтын боламыз. Ғылым және жоғары білім минстрлігіне арнайы хат жолдадық. Министрлік мәселені бақылауға алды. Арнайы зерделеу тобын құрып, бұл университеттегі жағдайды бақылауға алатын болады», - деді облыс әкімінің орынбасары Жолдас Батырхан.
Оқу жылының ортасында далада қалған студенттер енді әділдік іздеп сотқа жүгінбек.
