Арменияда полиция жаппай тәртіпсіздікке қатысқандарды ұстай бастады

Армения астанасы Ереванда Республика алаңындағы Үкімет үйі алдындағы шеру кезінде тәртіпсіздік ұйымдастырғандарды полиция жаппай қамауға ала бастады, деп хабарлайды Azattyq Ruhy.

Жергілікті БАҚ мәліметінше, бірін-бірі жаппай тәртіпсіздікке жасауға шақырған шерушілер үкімет ғимаратының кіреберісіне жақындаған. Олар полиция талаптарын орындаудан бас тартып, қоғамдық қауіпсіздікке қауіп төндірген.

Ақпаратқа сәйкес, бір топ адам үкімет ғимаратын күзетіп тұрған полиция қызметкерлеріне шабуыл жасаған. Олардың арасындағы жанжал тікелей қақтығыстарға ұласқан.

Тәртіп сақшылары бірнеше адамды қамауға алды. Арменияның Тергеу комитетінің Ереван қалалық тергеу басқармасының ауыр қылмыстар жөніндегі тергеу басқармасы қылмыстық іс қозғады.

Қазір тергеу амалдары жүргізіліп, бейнебақылау камераларының жазбалары тексеріле бастады. Тәртіпсіздікті ұйымдастырушылар мен қатысушыларды анықтау шаралары жүргізіліп жатыр.

Еске алсақ, Ереванда Әзербайжанның Таулы Қарабақтағы әскери операциясының басталуына байланысты наразылық шерулері өтіп жатыр. Үкімет үйінің алдында наразылыққа шыққандар ел премьер-министрі Никол Пашинянның отставкаға кетуін және Таулы Қарабақтағы армян халқын қорғауды талап етті.