Күдебаевтың ұлы Президентке бейнеүндеу жолдады
Ол Мемлекет басшысынан әкесіне араша сұрайды
Қаңтар оқиғасы бойынша күдікті деп танылған Алматы облыстық ПД бұрынғы басшысы Серік Күдебаевтың ұлы Президент Қасым-Жомарт Тоқаевқа бейнеүндеу жолдады, деп хабарлайды Azattyq Rýhy.
Бейнеүндеуде ол өз әкесіне араша сұрап, оған тағылған негізсіз айыпты алып тастауға көмектесуін сұрайды.
«Құрметті Президент, менің тікелей сізге бейнемәлімдеме жасау себебім қысылтаяң шақта бейбіт халықтың қаны төгілмес үшін, қарамағындағы қызметкерлері соққыға жығылмасын деп Қаңтар оқиғасы кезінде қызметтік міндетіне адал болған генерал Күдебаевтың бүгінгі тағдыры алаңдатады... Құрметті, Қасым-Жомарт Кемелұлы, менің әкем ішкі істер саласының шенді өкілі генерал Күдебаевқа тағылып отырған негізсіз айыпты алып тастауға ықпал етуіңізді сұраймын», - деді Серік Күдебаевтың ұлы.
Бейнеүндеу соңында Күдебаевтың ұлы Президенттің бір өзінен араша сұрап, ертеңгі күнге сенім артқысы келетінін айтады.
