Алматыда ЖРВИ мен тұмау өршіп тұр

Алматы қаласы Қоғамдық денсаулық сақтау басқармасының эпидемиологиялық қадағалау бөлімінің бас эпидемиологы Бақжанар Мұхамадиева Өңірлік коммуникациялар қызметінде өткен брифингте 6 қыркүйектен бастап қазіргі уақытқа дейін қалада ЖРВИ және тұмаумен науқастанып жатқандардың артқанын мәлімдеді, деп хабарлайды Azattyq Ruhy.

«Осы кезеңде ЖРВИ-нің 30 415 жағдайы және тұмаудың үш жағдайы тіркелді. Егер эпидемияға дейінгі маусымның басында 3876 бала (65,2%) бала науқастанса, бүгінгі күні ересектер арасында көбейіп отыр», - деді Бақжанар Мұхамадиева.

Оның айтуынша, тұмаудың алдын алудың ең тиімді әдісі – уақытылы екпе салдыру. Сол  үшін жергілікті бюджет қаражатынан 130 мың доза мөлшерінде ресейлік үшвалентті тұмауға қарсы «тұмау Плюс» вакцинасының бірінші партиясы сатып алынғанын атап өтті.

«Жыл сайын тұмауға қарсы вакцинаны эпидемияға дейін, яғни қазан-қараша айларына дейін алу керек.  Өйкені, тұмау вирусының мутацияға, модификацияға қабілеті бар. Вакцинациядан кейін иммунитет 14 күннен кейін қалыптасады және маусым бойы бір жылға дейін сақталады.

17 қазанда қосымша тағы 80 мың доза мөлшерінде вакцинаның екінші партиясы сатып алынды. Нәтижесінде ағымдағы эпидемияға дейінгі маусымда сатып алынған вакцинаның жалпы саны 210 мың дозаны құрады. екпе тегін» -деді спикер.