Алматы облысында құны 527 млн теңге болатын контрабандалық темекі тәркіленді

Алматы облысында құны 527 млн теңге болатын контрабандалық темекі өнімі анықталды, деп хабарлайды Azattyq Ruhy.

Мемлекеттік кірістер комитетінің хабарлауынша, Қаскелең қаласы, Алматы – Бішкек трассасының 29 шақырымында орналасқан «Кристалл» қонақүй-тұрақ кешенінің аумағында 925 мың қорап заңсыз темекі (18,5 млн темекі бірлігі) өнімі анықталды.

«Тексеру нәтижесі бойынша барлық материал ҚР Қылмыстық кодексінің 233-бабы бойынша заңбұзушылық белгілерімен Алматы облысы бойынша Экономикалық тергеу департаментіне берілді. Төленбеген акциздің шығын сомасы – 227,6 млн теңге. Темекінің жалпы құны – 527,3 млн теңге», - делінген хабарламада.

Белгілі болғандай, қылмыстық кодекстің 233-бабының 1-бөлігіне сәйкес, айыпталушыларға 1000 айлық есептік көрсеткішке дейінгі мөлшерде айыппұл салу және төрт жүз сағатқа қоғамдық жұмысқа тарту, немесе бір жылға дейiнгi мерзiмге бас бостандығын шектеу жазасы қолданылады.