23 жасар елорда тұрғыны дәріханадан жаялық ұрлап базарда сатқан
Күдікті бейнекамералар арқылы анықталды
Нұр-Сұлтанда дәріханадан балалар памперстерін ұрлап жатқан бойжеткен бейнекамераға түсіп қалды. Бұл туралы Нұр-Сұлтан қалалық полиция департаменті мәлім етті, деп хабарлайды Azattyq Rýhy.
Бейнебақылау камерасында фармацевттің кетіп қалғанын байқаған клиенттің сөреден екі бума памперс алып, дәріханадан шығып бара жатқанын анық көруге болады. Күдікті төрт күннен кейін дәл осылай тағы екі бума памперс ұрлап кетеді.
Содан ол ұрланған тауарларды базарда кездейсоқ өтіп бара жатқан адамдарға арзан бағамен сатып жіберген.
Жедел-іздестіру іс-шараларын жүргізу барысында полицейлер ұрлық жасаған күдіктіні бейнекамералар арқылы анықтады. Ол бұрын ұрлық жасағаны үшін бірнеше рет қылмыстық жауапкершілікке тартылған елорданың 23 жастағы тұрғыны болып шықты.
Қазіргі уақытта сотқа дейінгі тергеу амалдары жүргізілуде. Бойжеткен ұрлық жасағанын мойындады, оның елорда аумағында бұрын жасалған осыған ұқсас қылмыстарға қатысы бар-жоғына тексеру жүргізілуде.
