Тоқаев қорғаныс министрінің тағы бір орынбасарын жұмысынан қуды
Ақорда арнайы хабарлама жариялады
Президент Қасым-Жомарт Тоқаев Каспийдегі трагедиядан кейін қорғаныс министрінің тағы бір орынбасарын жұмысынан қуды, деп хабарлайды Azattyq Rýhy.
«Мемлекет басшысының өкімімен Әскер Құрманғалиұлы Бейсенов Қазақстан Республикасы қорғаныс министрінің орынбасары лауазымынан босатылды», – делінген Ақорданың хабарламасында.
Айта кетейік, 24 қыркүйек күні Каспий теңізінде оқу-жаттығу өткізіліп, 14 сарбаз суға кеткен. Арнайы құрылған комиссияның есебінде оқу-жаттығу барысында жіберілген кемшіліктер айтылған. Осыдан кейін президент Қорғаныс министрлігінде ауыс-түйіс жасап, екі орынбасары мен Әскери-теңіз күштерінің бас қолбасшысын қызметінен босатқан.
Ол 1978 жылы 12 қазанда Солтүстік Қазақстан облысының Петропавл қаласында дүниеге келген.
Әскери шені: Полковник.
Білімі:
- 1999 жылы Ярославль жоғары әскери қаржы училищесін «Әскерлерді қаржылай қамтамасыз ету және экономика» мамандығы бойынша бітірген.
- 2002 жылы Қазақ гуманитарлық-заң университетін тәмамдаған.
- 2014 жылы Қаржы академиясын бітірген.
Еңбек жолы:
- Қазақстан Республикасы Қорғаныс министрлігі Экономика және қаржы департаментінің бастығы қызметін атқарған.
- Дипломатиялық корпуста қызмет еткен.
- 2023 жылғы 24 сәуірден бастап – Қазақстан Республикасы қорғаныс министрінің орынбасары.
Марапаттары мен отбасы:
- Марапаттары: II дәрежелі «Айбын» ордені және медальдар.
- Отбасы жағдайы: Үйленген, 4 бала тәрбиелеп отыр.
