Еңбек министрі зейнетақы жинағын кімдер пайдалана алатынын айтты

Шамамен, 721 мың қазақстандық жылжымайтын мүлік сатып алу үшін жинақталған зейнетақы қаражатын пайдалана алады. Мұны Еңбек және халықты әлеуметтік қорғау министрі Біржан Нұрымбетов растады, деп хабарлайды LS.

Оның айтуынша, осы жылдың соңына дейін барлық шаралар қабылданып, халықтың зейнетақы жинақтарының бір бөлігін пайдалануға дайындық жұмыстары жүргізілетін болады.

«Қазірдің өзінде тұжырымдамамен бекітілген шешім бар. 721 мың адам жинақталған зейнетақы қаражатының бір бөлігін тұрғын үй сатып алуға мүмкіндік алады, бұл шамамен, 1,4 трлн теңгені құрайды», - деп түсіндірді ол.

Оның сөзінше, олардың ішінде жинақтары шекті межеден асатын 530 мыңға жуық жұмысшы, 178 мыңнан астам зейнеткер және сақтандыру компаниясымен зейнетақы аннуитеті шартын жасасқан 13 мың адам бар.

Дегенмен, министр жұмыс әлі жүріп жатқанын еске салып, жинақтағы шекті меже қанша болу керек екені және басқа да қосымша шарттар туралы нақты ақпаратпен бөліскен жоқ.

Бұған дейін 2021 жылдан бастап 700 мың қазақстандықтың зейнетақы жинақтарының бір бөлігін пайдалана алатыны туралы хабарланған болатын.