Ноғаев: Атырау университеттеріндегі жемқорлық мені қынжылтады

Атырау облысының әкімі Нұрлан Ноғаев өңірдегі білім саласындағы жемқорлыққа қатысты пікір білдірді.

«Әрине, Атырау мемлекеттік университеті мен мұнай-газ университетінің жемқорлық фактілері бойынша алда тұрғаны мені қынжылтады. Жемқорлықтың жойылуына тұрғындар да мүдделі. Аталған мәселе «Nur Otan» партиясының қоғамдық кеңесінде де талқыланды. Университеттерде де шаралар қабылданды», - деді.

Әкімнің айтуынша, Атырау мемлекеттік университеті студенттер арасында пара алуға бейім оқытушылар жөнінде сауалнама жүргізеді. Сауалнама қорытындысы бойынша жемқорлыққа жол беретін оқытушыларды емтиханға жібермейді.

Еске салайық, өткен аптада «Nur Otan» партиясы жанындағы «Jas Otan» жастар қанаты жүргізген сауалнама нәтижесінде Х.Досмұхамедов атындағы Атырау мемлекеттік университеті мен Атырау мұнай-газ университеті Қазақстандағы жемқорлық жайлаған ЖОО-лар тізімінде «көш бастаған» болатын.