Ақтөбе облысында жасөспірімді құтқармақ болған ер адам онымен бірге көз жұмды
Қайғылы оқиға Танаберген өзенінде болды
Ақтөбе облысының Алға ауданындағы Танаберген өзенінде қайғылы оқиға болды, деп хабарлайды Azattyq Rýhy «Диапазон» басылымына сілтеме жасап.
15 жастағы жасөспірім шомылуға тыйым салынған жерде суға бата бастаған. Оған көмектесуге 32 жастағы ер адам жүзіп барған, бірақ ол бозбаланы құтқара алмай, онымен бірге суға батып кеткен.
«Оқиға орнына Алға ауданының өрт сөндіру қызметінің, әкімдіктің және төтенше жағдайлар бөлімінің қызметкерлері келді. Іздестіру-құтқару жұмыстарына сүңгуірлер тартылды. Марқұмдардың мәйіті жағалаудан 7 метр қашықтықта, шамамен 3 метр тереңдіктен табылды», - деп хабарлады ТЖД баспасөз қызметі.
Еске сала кетейік, тамыз айының басында Ақтөбе қаласындағы бассейнде екі бірдей адам суға батып кеткен болатын. Облыстық полиция департаментінің мәліметінше, әртүрлі уақытта болған екі оқиға бойынша қылмыстық іс қозғады.
