Шымкент түрмесінде экстремизмді насихаттаған жігіт жазасын көбейтіп алды

Шымкент қаласының қылмыстық істер жөніндегі ауданаралық сотында экстремистік әрекеттерге шақырған азаматқа қатысты іс қаралды, деп хабарлайды Azattyq Rýhy.

Тергеу материалдарына сәйкес, сотталушы А. 2025 жылдың сәуір–мамыр айлары аралығында №54 түзеу мекемесінің аумағында жасырын жиындар ұйымдастырып, тыйым салынған «Х...» экстремистік ұйымының идеяларына қатысты жазбаларды оқып, қатысушыларды радикалды әрекеттерге үгіттеген.

Сотта оның кінәсі толық дәлелденді. Прокурор айыпталушыға бас бостандығынан айыру жазасын сұраса, сотталушы кінәсін мойындап, жеңіл жаза тағайындауды өтінді.

Сот жаза тағайындау кезінде сотталушының асырауында бес жасөспірім баласының барын жеңілдететін мән-жай ретінде, ал қылмыстың қайталануын ауырлататын жағдай ретінде ескерді.

Нәтижесінде сот А.-ны Қылмыстық кодекстің 259-бабы 1-бөлігі бойынша кінәлі деп танып, 8 жыл 6 айға бас бостандығынан айырды.

Үкім заңды күшіне енген жоқ.