Қостанай облысында тағы 4 адамнан коронавирус анықталды

Қостанай облысында тағы төрт адамнан індет анықталды. Бұл туралы ақпаратты өңірлік жедел штаб өкілдері мәлімдеді.

Ресми мәліметке сүйенсек, төрт жағдай да Жітіқара  қаласында тіркелген.   

Төрт азаматтың екеуі (1972 және 1993 жылы туған) бұған дейін індет жұқтырған зейнеткерлермен көрші тұрған. 1975 және 1998 жылы туған екі азамат та науқастармен жақын қарым-қатынаста болыпты.

«ПТР диагностикалық зерттеу нәтижесі бойынша 4 пациентте де COVID-19 диагнозы расталды.   Қазіргі таңда науқастардың жағдайы қанағаттанарлық, шағымдары жоқ. Аталған азаматтар оқшауланды және тиісті емдеу шараларын алуда. Олармен байланыста болған адамдарды анықтау және оқшаулау бойынша жұмыстар жүргізіліп жатыр. Індет ошақтары залалсыздандырылды», - деп мәлімдеді өңірлік жедел штаб.  

Жалпы 20 сәуірдегі жағдай бойынша облыста COVID-19 індетін жұқтырған 19 адам анықталды. Оның үшеуі – Тобыл қаласында госпитальда жатыр. Жітіқарада – 15, Арқалық қаласында 1 науқас тіркелген.