Алматылық тұрғынның сарайынан сегіз «Сайга» қаруы табылды

Алматы полицейлері тұрғыннан сегіз «Сайга» қаруын тәркіледі, деп хабарлайды Azattyq Rýhy.

Бұл жолы Алматының Наурызбай ауданы тұрғынының сарайынан қару-жарақ, оптикалық көздеуіш және аңшылық құралдары сақталған орын табылды.

«Арнайы іс-шара кезінде 1984 жылы туған К. есімді азамат ұсталды. Жедел іс-шаралар барысында оның осы жылдың 5 қаңтарында «Камерад» қару-жарақ дүкенін тонауға қатысқаны, нәтижесінде 12-ші калибрлі тегіс ұңғылы сегіз мылтықты ұрлағаны анықталды. Күдікті олжаны «қажет болғанға дейін» өзгелердің көзінен таса жерде, сарайда жасырғаны анықталды.  Барлық қарулар тәркіленді. Оларға сараптама тағайындалды», – деді Алматы қалалық Полиция департаменті бастығының орынбасары Берік Әбілбеков.

«Камерад» қару-жарақ дүкенінен қару-жарақ пен өзге де мүлікті ұрлау дерегі бойынша қылмыстық істі Әуезов аудандық ПБ жанындағы полиция бөлімі тергеп жатыр.

Күдікті қамауға алынды.