ШұғылЕлімізде өткен тәулікте 142 адамнан коронавирус анықталды

Ұшақ апатына себеп болуы мүмкін бірнеше нұсқа зерттеліп жатыр – министр

ІІМ басшысы тергеушілер әуе апатына әкеп соқтырған барлық оқиғалардың хронологиясын қалпына келтіру керек екенін атап өтті

Мемлекет басшысының тапсырмасымен Ішкі істер министрлігі Алматы облысы Гүлдала ауылының аумағында «Fokker-100» жолаушылар әуе кемесінің  апатқа  ұшырау фактісі бойынша ҚР Қылмыстық кодексінің 344-бабының 3-бөлігіне сәйкес сотқа дейінгі тергеу жүргізілуде, деп хабарлайды Azattyq Rýhy ҚР ІІМ баспасөз қызметіне сілтеме жасап.

«ІІМ ұшақтың апатқа ұшырауына әкеп соққан себептер мен жағдайларды сапалы және объективті тексеру жүргізеді. Тергеу барысында барлық құжаттар, аудио және бейнежазбалар зерттеледі. Әуе кемесінің жай-күйіне бірқатар сараптама, оның ішінде өрт-техникалық және көліктік - трассологиялық сараптама тағайындалды», - деді Ішкі істер министрі Ерлан Тұрғымбаев.

ІІМ басшысы тергеушілер әуе апатына әкеп соқтырған барлық оқиғалардың хронологиясын қалпына келтіру керек екенін атап өтті. Осы мақсатта қызметкерлер ұшуды ұйымдастыру мен өткізуге қатысатын барлық жердегі және авиациялық қызметтердің жұмысын тексереді, жауапты тұлғалардан жауап алу және осы рейстің жолаушыларынан сауалнама алу жүргізіледі.

Ұшу-қону жолағына тексеру жүргізілді. Әуе кемесінен өздігінен жазғыш құралдары мен борт журналы алынды. Қазіргі уақытта ұшақтың құлау ауданын тексеру жалғасуда.

«Халықаралық талаптарға және осы санаттағы қылмыстық істерді тергеу ерекшеліктеріне сәйкес, оған Халықаралық авиация комитетінің және ұшақты дайындаушы зауыттың өкілдері қатысады, олармен бірге алынған өздігінен жазу құралдарындағы жазбалардың мәнін анықтау, кеме қозғалтқышы мен оқиға орнын тексеру жүргізіледі», – деп атап өтті министр.

Апатқа ұшыраған әуе кемесі 1996 жылы Голландияда Fokker зауытында салынып, 2020 жылдың 21 мамырына дейін ұшу жарамдылығы сертификатына ие болғаны анықталды.

Жедел-тергеу тобы бірнеше нұсқаларды, соның ішінде кеменің техникалық ақауын, ауа райы және метеорологиялық жағдайларды, сондай-ақ ұшу кезінде жіберілуі мүмкін қателерді пысықтайды.

28 желтоқсандағы жағдай бойынша Алматы қаласының медициналық мекемелерінде зардап шеккен 47 адам, оның ішінде 9 бала стационарлық ем алуда. 4 зардап шегушіге медициналық тексеруден кейін амбулаторлық ем тағайындалып, үйлеріне жіберілді. Қаза болғандардың саны өзгерген жоқ (12 адам).