Нұрсұлтан Назарбаев «ҚазМұнайГазды» қайта құруды тапсырды
«ҚазТрансГаз» бен «ҚазТрансОйл» енді «Самұрық-Қазынаның» еншілес компанияларына айналмақ
Бүгін ҚР Тұңғыш Президенті - Елбасы Нұрсұлтан Назарбаев «ҚазМұнайГаз» компаниясын қайта құрып, құрамындағы компанияларды бөлек шығару туралы ұсынысты қолдады, деп хабарлайды ҚазАқпарат.
Назарбаев бұл ойын «Самұрық-Қазына» ұлттық әл-ауқат қорын басқару жөніндегі кеңестің отырысында жария еткен.
«ҚазМұнайГаз» құрамындағы «ҚазТрансГаз» бен «ҚазТрансОйл» компанияларын «Самұрық-Қазынаның» еншілес компаниялары ретінде бөлу жолымен қайта құру ұсынысын қолдаймын. Бұл «ҚазМұнайГаздың» басты жұмысына – мұнайды барлау, қазу және қайта өңдеуге көңіл бөлуге мүмкіндік береді. Ал көліктік компаниялар транспорттық маршрутты әртараптандыруға жағдай жасайды. Қордың басшылығына осы мәселені тез арада қарап, шешім қабылдауға тапсырма беремін», - деді Нұрсұлтан Назарбаев.
