Депутат Жасыбай көлінде маңызды су жобасын бастауды ұсынды

Мәжіліс депутаты, «AMANAT» партиясы фракциясының мүшесі Нұржан Әшімбетов премьер-министрдің орынбасары Қанат Бозымбаевтың атына депутаттық сауал жолдады, деп хабарлайды Azattyq Rýhy.

«Біздің депутаттық сауалымыз ел президенті алға қойған маңызды міндеттердің бірі – су ресурстарын қорғау мәселесіне арналған. Ағынды суларды тазарту және қайта пайдалану барлық елдерде кеңінен қолданылады. Алайда бүгінгі күні Қазақстанда мұндай технологияларды қолданудың тиісті дамуы жоқ. Қабылданған Су кодексінде өнеркәсіптік кәсіпорындар суды қайта пайдалануды қолдануға міндетті нормалар қабылданды.  Сондай ақ 2027 жылдан бастап барлық субъектілер үшін қайта су пайдалануды қолдану жоспарынсыз су пайдалану рұқсаттамасы берілмейтіні заңнамалық тұрғыдан қарастырылған», - дейді депутат. 

Сондықтан, ол пилоттық жоба ретінде Павлодар облысындағы Баянауыл ұлттық табиғи паркінің Жасыбай көлінің демалыс аймағында іске асыруды ұсынған. Өз сөзінде депутат неге дәл Баянауыл ұлттық табиғи паркінің Жасыбай көлі таңдалғанын түсіндірді.

«Біріншіден, бүгінгі таңда 100-ден астам туризм субъектілері ағынды суларды ағызу құдықтарына жинайды, содан кейін олар қауіпті тау беткейлері арқылы аудан орталығынан тыс орналасқан полигон аумағына төгіле, бұл 30 шақырымнан астам жер. Ондаған мамандандырылған көліктердің қозғалысы жол қауіпсіздігіне әсер етеді, ал бизнес үшін көлік шығындары жыл сайын өседі, бұл сайып келгенде демалушылардың қалтасына әсер етеді», - дейді депутат.

Екіншіден, оның айтуынша, қызметтердің қымбаттауына байланысты кәсіпкерлер тарапынан ағынды суларды септиктерден басқа нысандарға төгуге немесе суды пайдалануды азайтуға ұмтылады, бұл экологиялық жүктемеге және туристерге қызмет көрсету сапасының нашарлауына әкеледі. Мысалы, бүгінгі күні орталық жағажайда қарапайым модульдік дәретханалар ғана орнатылған.

«Үшіншіден, жобаны іске асыру жағдайында тазартылған суларды өндірістік және шаруашылық қажеттіліктер үшін, соның ішінде әсіресе жазғы кезеңде қажет болатын жасыл желектерді суару үшін пайдалануға болады. Құрметті Қанат Алдабергенұлы, жоғарыда айтылғандарға байланысты, тиісті министрліктер мен әкімдіктерге суды қайта пайдалану технологияларын ескере отырып, суды үнемдеу шаралары бойынша жол карталарын дайындауды, сондай-ақ Павлодар облыстық әкімдігіне Экология және табиғи ресурстар министрлігімен бірлесе отырып, 2026 жылы «Жасыбай көлі» туристік аймағындағы Баянауыл ұлттық паркінің аумағында ағынды суларды тазарту пилоттық жобасын жүзеге асыруды тапсыруыңызды сұраймыз», - деді сөзін түйіндеген депутат.