Сабыржан Аққалықов Әлем кубогында алтын медаль жеңіп алды

Қазақстандық былғары қолғап шебері Сабыржан Аққалықов Астанада өтіп жатқан бокстан Әлем кубогында жеңіс тұғырынан көрінді, деп хабарлайды Azattyq Rýhy.

Ол 75 келіге дейінгі салмақ дәрежесінде қарсыластарын сенімді түрде жеңіп, алтын медаль иеленді.

Финалдық жекпе-жекте Сабыржан болгариялық боксшы Рами Киванмен кездесіп, алғашқы раундтардан-ақ басымдық танытты. Қорытындысында төрешілердің бірауыздан қабылдаған шешімімен Аққалықов чемпион атанды.

Бұл – Қазақстан құрамасының аталған турнирдегі жетінші алтын медалі. Бұған дейін Назым Қызайбай (48 кг), Санжар Тәшкенбай (50 кг), Махмұд Сабырхан (55 кг), Виктория Графеева (60 кг), Наталья Богданова (70 кг) және Бекзад Нұрдәулетов (85 кг) чемпион атанған болатын.