$ 503.05  542.99  5.98
ҚАЗ
×
Бұл желілік ресурстың ақпараттық өнімдері 18 жастан асқан адамдарға арналған.
13.03.2025, 18:00
Қоғам

Қазақстандықтар енді жүргізуші куәлігін онлайн ауыстыра алады

eGov Mobile қосымшасында жаңа сервис іске қосылды

Қазақстандықтар енді жүргізуші куәлігін онлайн ауыстыра алады
Фото: Azattyq Rýhy/Әбілқасым Есентаев

Енді Қазақстан азаматтары жүргізуші куәлігін eGov Mobile мобильді қосымшасы арқылы онлайн ауыстыра алады, деп хабарлайды Azattyq Rýhy.

Бұл қызметті жүргізуші куәлігінің мерзімі аяқталса, құжат жоғалып не ұрланса, төлқұжат деректері өзгерсе қолдануға болады. Жаңа сервис іске қосылғаннан бері оны 7 мыңнан аса адам пайдаланған.

«Бұл қызметтің басты ерекшелігі – бұрын берілген жеке куәлік немесе төлқұжаттағы фотосуретті пайдалану мүмкіндігі. Негізгі шарт – фотосуреті бар құжат соңғы үш жыл ішінде шығарылған болуы тиіс», - деп мәлімдеді «Ұлттық ақпараттық технологиялар» АҚ.

Онлайн қызметті пайдалану үшін:

  • eGov Mobile мобильді қосымшасында авторизациядан өтіп, «Қызметтер» бөліміне өту қажет;
  • «Жүргізуші және көлік» бөлімінен «Жүргізуші куәлігін беру» қызметін таңдау;
  • дайын құжатты алатын ХҚКО-ны таңдау;
  • жүргізуші куәлігін ауыстыру себебін көрсету және фотосуретті жүктеу;
  • қолтаңба үлгісін жүктеп, байланыс нөмірін енгізу керек;
  • мемлекеттік бажды төлеу қажет (4 915 теңге);
  • өтінімді Face/Touch ID көмегімен растау қажет;
  • қызмет нәтижесі «Хабарламалар» бөлімінде қолжетімді болады.

Өтінім мақұлданғаннан кейін жүргізуші куәлігін өзіңіз таңдаған ХҚКО-дан алуға болады. Өзіңізбен бірге жеке куәлігіңіз бен ескі жүргізуші куәлігін ала бару қажет. Жаңа құжат берілгенге дейін бұрынғы куәлік жарамды болып қала береді (егер оның мерзімі аяқталмаса).

Жүргізуші куәлігін ауыстыру қызметі eGov.kz порталында да қолжетімді.

Серіктес жаңалықтары