«VIP-зираттар пайда болады»: депутат қабірлерді жекешелендіруге қарсы шықты

Сенатор Андрей Лукин зираттарды жеке меншікке беруге қарсы шығып, оларды жекешелендіру жоспарынан алып тастауды талап етті, деп хабарлайды Azattyq Rýhy.

«Жер кодексіне сәйкес, зираттар – жерлеуге арналған арнайы жер. Оны коммерциялық мақсатта пайдалануға тыйым салынған. Егер жерлеу қызметтері бәсекелестік ортаға берілсе, бұл саланың монополияға айналуына әкеледі. Алаяқтық көбейіп, жер учаскелері заңсыз бөлінуі мүмкін», – деді сенатор.

Ол Астанадағы жағдайды мысалға келтірді.

«Қазір елордада жерлеудің құны республика бойынша ең төмен. Бірақ жекешелендірілген жағдайда, жеке меншік компаниялар бағаны көтеретіні анық. Мысалы, COVID-19 пандемиясында кейбір жеке компаниялар бір адамды жерлеу үшін 1 миллион теңгеге дейін сұраған. Ал мемлекеттік құрылымдар қолжетімді баға ұсынды»,– деп атап өтті.

Сондай-ақ, сенатор «зираттарды коммерциялық ортаға берсек, VIP-зираттар пайда болады, мен бұған қарсымын» деп мәлімдеді.

Осыған байланысты, Лукин үкіметке:

• Зираттарды жекешелендіруді тоқтатуды,
• Жерлеу рәсімдерін реттейтін арнайы заң қабылдауды,
• Негізгі жерлеу қызметтерінің шекті бағасын белгілеуді,
• Зираттағы жерді заңсыз сатқаны үшін қылмыстық жаза енгізуді ұсынды.