Енді дарынды оқушыларға тегін мемлекеттік грант пен «Болашақ» стипендиясы беріледі

Енді  халықаралық ғылыми жобалар конкурстары мен олимпиадалардың жеңімпазы атанған оқушыларға тегін грант пен «Болашақ» бағдарламасымен шетелде оқу мүмкіндігі беріледі, деп хабарлайды Azattyq Rýhy.

Бұл нормалар «Кейбір заңнамалық актілерге мәдениет, білім беру және тәлімгерлік мәселелері бойынша өзгерістер мен толықтырулар енгізу туралы» заңда көзделген.

«Заң аясында Халықаралық ғылыми жобалар мен олимпиадалардың жеңімпаздарына жоғары оқу орындарына гранттар беруді және «Болашақ» бағдарламасы аясында бакалавриатқа түсу мүмкіндігі енгізіледі. Бұл шаралар жастардың білімге ұмтылысын арттыруға, болашағынан ерекше үміт күттіретін, өзгеше ойлап, ертеңіне сеніммен өсіп келе жатқан дарынды жастарымызды қолдауға бағытталған», - деді Сенат депутаты Әсем Рахметова жалпы отырыста.

Дәлірек айтқанда, дарынды оқушыларды мемлекеттік қолдау және олардың ғылыми қызметін ынталандыру мақсатында халықаралық ғылыми жобалар конкурстарының соңғы үш жылдағы жеңімпаздары мен жүлдегерлеріне конкурстан тыс мемлекеттік білім беру гранттары беріледі.

Ал халықаралық олимпиадаларда жеңіске жеткен мектеп түлектері әлемнің ең үздік университеттерінде бакалавриат деңгейінде оқуға мүмкіндік алады.