Ұлттық банк Қазақстанның футбол клубтары туралы монеталар шығармақшы

Ұлттық банк «Спорт» сериясынан «Қазақстанның футбол клубтары» және «Қазақстанның футбол федерациясы» коллекциялық монеталарын айналымға шығарады, деп хабарлайды Azattyq Rýhy.

Ұлттық банк жобаны Қазақстан футбол федерациясымен бірлесіп жүзеге асырып жатыр. Жоба аясында «Қазақстанның футбол клубтары» коллекциялық монеталарының 13 түрі дайындалған.

«Монеталарда 2024 жылғы маусымның ҚР премьер-лигасы клубтарының логотиптері бейнеленген. Монеталардың әр түрінен 7000 дана дайындалады. Оның 5000 данасы жеке блистерде және әр түрінен 2000 монета «Қазақстанның футбол клубтары»  кәдесый блистер жиынтығында жиналады», - деп мәлімдеді Ұлттық банк.

Ал «Қазақстанның футбол федерациясы» монетасында ҚФФ логотипі бейнеленген. Таралымы – 2000 дана. «Қазақстанның футбол клубтары» кәдесый блистер жиынтығының құрамында сатылады.

Коллекциялық монеталар Қазақстан теңге сарайында мельхиор (МН 25) қоспасынан дайындалған. Массасы – 15 грамм, диаметрі – 33 мм, дайындау сапасы – brilliant uncirculated, номиналы – 200 теңге.

Бұл монеталарды Қазақстан аумағында барлық төлем түрі бойынша қабылдауға, банк шоттарына аударуға, ұсақтауға және айырбастауға болады.

Коллекциялық монеталардың сатылымға шығатын күні туралы ақпарат Ұлттық банктің ресми сайтында жарияланады.