Талғар маңында Шерзат Болаттың ағасының денесі табылды

Талғар қаласы маңынан 30 жастағы ер адамның денесі табылды. Алдын ала мәліметтерге сәйкес, ол асылып өлген. Бұл туралы облыстық полиция департаменті мәлімдеді, деп хабарлайды Azattyq Rýhy. 

Анықталғандай, марқұм биыл 4 қазанында кісі қолынан қаза тапқан Шерзат Болаттың ағасы болып шықты.

«Аталған факт бойынша қылмыстық іс қозғалды. Қазіргі уақытта оқиғаның барлық мән-жайын анықтау үшін тергеу амалдары жүргізілуде. Тергеу барысында қылмыстық сипаттағы белгілер табылған жоқ», - делінген хабарламада.

Полицияның мәліметінше, Ш. Болаттың отбасы қайғылы жағдайдан кейін полиция қызметкерлерінің қорғауында болған. Осы уақытқа дейін отбасы мүшелеріне ешқандай қауіп-қатер төнбеген. Қорғауға жауапты қызметкерлердің хабарлауынша, ер адам 23:30 шамасында күзетілетін нысаннан шығып, жеке көлігімен кетіп қалған.

Тергеу мүддесіне байланысты басқа ақпарат жарияланбайды. Қосымша мәліметтер қолжетімді болған жағдайда хабарланады.