Қазақстанда әйелдерден қарағанда ер адамдар көп жоғалатын болып шықты

Қазақстанда қазір 9 415 адам іздестіріліп жатыр, олардың 2 096-сы – хабар-ошарсыз кеткендер. Құқықтық статистика және арнайы есепке алу жөніндегі комитет осындай статистика жариялады, деп хабарлайды Azattyq Rýhy.

Із-түссіз жоғалғандардың көбі Алматы қаласында, Қарағанды, Павлодар және Алматы облыстарында тіркелген.

«Ең көп 30-49 жас аралығындағы ер адамдар (77%) әртүрлі жағдайларда жоғалады. Үйінен шығып, қайта оралмағандар – 1 558, автокөлікпен жоғалғандар - 72, жұмыстан шыққандар – 33 адам», - дейді комитеттегілер.

Бұдан бөлек, елімізде тергеуден және соттан жасырынған 2 184 адам іздеуде жүр. Дені – 31-40 жас аралығындағы ер адамдар. Олардың басым бөлігі – Алматы, Астана және Шымкент қалаларында, сондай-ақ Алматы мен Қарағанды облыстарында алаяқтық, ұрлық және адам өлтіргені үшін іздеуге салынғандар.

Айта кетері, Қазақстанда іздестіру жұмыстарын ішкі істер органдары, экономикалық тергеу қызметі және сыбайлас жемқорлыққа қарсы қызмет жүргізеді.