Димаштан кейін қытайлық Singer сахнасына тағы бір қазақ әншісі шықты

Әнші Рухия Байдүкенова  қытайлық Singer сахнасында бақ сынайды. Бұл туралы продюсер Ертай Нүсіпжанов әлеуметтік желідегі парақшасында жазды, деп хабарлайды Azattyq Rýhy.

«Араға 7 жыл уақыт салып Singer сахнасына қайта оралдық. Бұл жолы - Рухия. 4 жыл үзілістен кейін тағы да миллиондаған көрерменге жол тартқан аты әлемге әйгілі музыкалық тележоба осы жылдың мамыр айында басталды. Бұл маусымның басты ерекшелігінің бірі - жоба тікелей эфирде, Қытайда өтіп жатыр. Бағалау халықтың дауыс беруі негізінде болады.

Рухия бүгін, Қазақстан уақытымен сағат 17:00-де 8-кезеңде өнер көрсетеді. «Топ жару» статусымен келген бірінші шетелдік әншіге қойылған талап бойынша, Рухия алдыңғы 7-кезеңде үздік 4-ке енген әншілердің бірін таңдап, онымен жекпе-жек сайысқа түседі. Бағалаушы барша көрермендердің дауыс беру нәтижесі бойынша, жеңсе келесі кезеңге өтеді. Ал, жеңілсе біз үшін сайыс осы тұста аяқталады.

Қалай болғанда да бұл үлкен еңбек, артыс-тартыспен келген жеңіс. Жеңіс дейтінім үлкен сахнада тағы бір қазақ күллі әлемге өнер көрсетіп, Қазақтың атын шығарады. Бұдан асқан жеңіс бар ма, сірә! Қуан, қазақ! Қолда, қазақ!» - деп жазды продюсер.