Ауыл халқы үшін жаңа тұрғын үй бағдарламасын жасау қажет – Мемлекет басшысы

Ұлттық құрылтайда Мемлекет басшысы Қасым-Жомарт Тоқаев Үкіметке биыл ауқымды төрт инфрақұрылымдық бастаманы жүзеге асыруды тапсырды, деп хабарлайды Azattyq Ruhy.

Соның бірі, әлеуметтік тұрғыда осал топтағы жандар үшін баспана салу. Ондағы несие өсімі 7 пайыздан аспауы тиіс.

«Ұлттық құрылтайда біз мәдени-гуманитарлық саланың және идеологияның жаңа бағдарын айқындаймыз. Осының бәрі ұлттық бірегейлігімізді нығайту және елімізді қарқынды дамыту үшін өте маңызды. Дегенмен, өзгерістердің басты мақсаты – халықтың тұрмыс сапасын жақсарту. Сондай-ақ әр азаматтың жан-жақты дамуына жағдай жасау. Осыған орай экономиканы дамытатын жаңа мүмкіндіктерді үнемі іздеп отыру керек. Бізге әжептәуір мультипликативтік нәтиже беретін жобалар қажет. Сол үшін Үкіметке биыл ауқымды төрт инфрақұрылымдық бастаманы жүзеге асыруды тапсырамын», - деді Президент.

Ең алдымен қазір жұмыс істеп тұрған 55 жылу орталығын толығымен жөндеу тапсырылды. Ұзындығы кемінде 6,5 мың шақырым болатын инженерлік жүйені жаңғырту керек. Бұл қадам азаматтар мен кәсіпкерлерге көрсетілетін коммуналдық қызметтің сапасын арттыруға мүмкіндік береді. Ал, баспана – жұрттың  тұрмыс сапасын танытатын тағы бір маңызды көрсеткіш.

«Биыл 1 наурыздан бастап іске қосылған «Отау» ипотекалық бағдарламасы ел ішінде үлкен сұранысқа ие болып отыр. Бұған қоса ауыл және аудан орталығының тұрғындарына арналған жаңа тұрғын үй бағдарламасын қолға алу керек. Бұл ретте әлеуметтік тұрғыда осал топтағы жандар үшін несие өсімі 7 пайыздан аспауы қажет. Сонымен қатар сатып алу құқығымен жалға берілетін баспана санын бірнеше есе көбейтуді Үкіметке тапсырамын», - деді Мемлекет басшысы.

Жеңілдетілген жаңа ипотеканың енгізілуі және жалға берілетін тұрғын үйдің көптеп салынуы құрылыс қарқынын арттырады.

«Құрылыс саласында жүз мыңдаған отандасымыз адал еңбек етіп жүр. Еңқұрылы бастысы, бұл бағдарлама баспанаға мұқтаж көптеген адамның үй алуына жол ашады», - деді Президент.