Трансшекаралық электронды коммерцияны дамытуға жәрдемдесеміз – Ли Цян

ҚХР мемлекеттік кеңесінің премьері Ли Цян Бейжіңдегі Халық жиналысы үйі ғимаратында Мемлекеттік XIV Халық Құрылтайының екінші сессиясында сыртқы сауда көлемін тұрақтандыру қажеттігі жайлы айтты, деп хабарлайды Azattyq Ruhy.

«Сыртқы сауда көлемін тұрақтандыруға және оның сапалық көрсеткіштерін арттыруға ықпал ету керек. Экспорт пен импортқа кредиттік қолдауды, сондай-ақ экспорттық кредиттерді сақтандыру қолдауын күшейту, трансшекаралық есеп айырысу, валюталық тәуекелдерді басқару және осы  саладағы қызметтердің сапасын жақсарту, кәсіпорындардың нарықты әртараптандыруды жүргізу жөніндегі күш-жігерін қолдау қажет. Біз трансшекаралық электронды коммерцияны және шаруашылық қызметтің басқа да жаңа нысандарын сау дамытуға жәрдемдесеміз. Шетелдік қоймаларды орналастыруды оңтайландырып, қайта өңдеумен сауданы жаңғыртуды, оны арттыруды қолдаймыз, аралық өнімдер саудасын, «жасыл» сауданы және өсудің басқа да жаңа көздерін кеңейтеміз», - деді Ли Цян.

Оның айтуынша, импортты белсенді түрде арттыру қажет.

«Қызметтердің трансшекаралық саудасын дамытуды регламенттейтін теріс тізім барлық жерде қолданысқа енгізілсін. Қызметтер саудасын және цифрлық сауданы инновациялық дамыту саласындағы саясатты әзірлеу керек. Ішкі және сыртқы сауданың интеграцияланған дамуын жеделдеткеніміз абзал. Біз Қытайдың халықаралық импортын тиісті түрде жүргізуіміз керек. ЭКСПО, Қытай импорттық және экспорттық тауарлар жәрмеңкесі, Қытай Халықаралық қызметтер сауда жәрмеңкесі, жаһандық цифрлық сауда көрмесі және басқа да ірі көрмелер мен жәрмеңкелерді белсенді ұйымдастыруды жалғастыру қажет. Халықаралық логистика жүйесін құруды жеделдету, сыртқы сауда кәсіпорындарына шығындарды қысқартуға және қызмет тиімділігін арттыруға қолдау көрсету үшін «ақылды» кеден салуға ұмтылу қажет», - дейді Ли Цян.

Жиында 2023 жылғы көрсеткіштер мен 2024 жылға арналған жоспарлар айтылды.