«Жедел жәрдем қызметкерлерін қорғауды талап етеміз!»: қазақстандықтар қол жинай бастады

Жедел жәрдем қызметкерлері өз құқықтарын қорғауды талап етуде. Қазіргі уақытта alash.online сайтында жедел жәрдем қызметкерлерін қорғауды талап ететін петиция жарияланды. Жарияланымның авторы –  жедел жәрдем көлігінің жүргізушісі Арғын Смаилов, деп хабарлайды Azattyq Rýhy.

«10 жылдық тәжірибесі бар жедел жәрдем көлігінің жүргізушісі ретінде өз әріптестерімнің проблемалары туралы айтқым келеді. Біздің құқығымыз үнемі тапталады, адамдардың бізге деген сенімсіздігі де шаршатады. Бір жағынан, қоғам бізден адам өмірін сақтап қалуды және қоңырауларға тез жауап беруді талап етеді. Екінші жағынан, бізді жай ғана құрметтемейді, тіпті жұмыс істеуге де тыйым салады.Олар біздің аулаға кіруімізге, көлікті қоюымызға кедергі келтіреді. Көлігімізді қағып, тепкілейтіндер де бар. Тіпті, кейбіреулер бізді ұрып-соғуға дейін барады. Сонымен қатар, жедел жәрдем дәрігерлері шақырылған пәтерлерде жиі шабуылға ұшырайды. Дәрігерлер мен медицина қызметкерлерін құрметтемеу медицинада кадрлардың көп ауысуына себеп болды. Жедел жәрдем қызметкерлері қорғансыз екенін мойындау керек», - деп жазады автор.

Сондай-ақ, автор жедел жәрдем қызметкерлерінің мәртебесін қорғайтын уақыт келгенін айтады.

«Мұғалімдердің, әскерилер мен полиция қызметкерлерінің өз мәртебесі бар. Сол секілді біздің де мәртебемізді және біздің өзімізді азаматтардың жөнсіз әрекетінен қорғайтын уақыт келді. Медицина қызметкерлеріне жасалған агрессияны полицияға жасалған шабуылмен теңестіру керек. Төтенше жағдайлар қызметкерлері ретінде біз өзімізді қауіпсіз сезінгіміз келеді. Елімізге жедел медициналық көмек қажет деп есептейміз!», - дейді ол.