Діни экстремизмнің алдын алу: Алматыда 2 мыңнан астам адамға түсіндіру жұмысы жүргізілді

Алматы қаласы Дін істері жөніндегі басқармасының тапсырысы негізінде 10-15 тамыз аралығында «Дін мәселелерін зерттеу орталығы» тұрғындар арасында діни экстремизм мен терроризмнің алдын алуға бағытталған 9 ақпараттық-түсіндіру іс-шарасын өткізді. Кездесулерге жалпы 2 235 адам қатысты, деп хабарлайды Azattyq Rýhy.

Ақпараттық-түсіндіру жұмысы қаланың әртүрлі әлеуметтік және қоғамдық орындарын қамтыды. Атап айтқанда, Медеу ауданындағы №6 кітапханада, «Бақытты отбасы» орталығында, Райымбек батыр кесенесінде, Түрксіб аудандық полиция басқармасының көші-қон қызметінде, Бостандық аудандық полиция басқармасында, Әуезов ауданындағы «Азаматтарға арналған үкімет» мемлекеттік корпорациясының бөлімінде, Түрксіб ауданындағы жұмыссыз азаматтар арасында, «Car City» сауда орталығында және Алматы қаласы бойынша ҚАЖ департаментінің №11 мекемесінде кездесулер ұйымдастырылды.

Іс-шаралардың әртүрлі аудиторияны қамтуы діни экстремизм мен терроризмнің алдын алу бағытындағы түсіндіру жұмысының тек белгілі бір әлеуметтік топпен шектелмейтінін көрсетеді. Мамандар мемлекеттік мекеме қызметкерлері, жұмыссыз азаматтар, келушілер, сауда орталығындағы жалға алушылар мен қызметкерлері, сондай-ақ қылмыстық-атқару жүйесі мекемелеріндегі азаматтарға ақпарат жеткізді.

Кездесулер барысында қатысушыларға экстремизм мен терроризмнің қоғамға тигізетін кері әсері, радикалды идеологиялардың қауіптілігі және олардың таралуына жол бермеу жолдары түсіндірілді. Сонымен қатар мамандар алдын алу шараларының маңызына тоқталып, діни мәселелерге қатысты ақпаратты сенімді дереккөздерден алудың қажеттігін атап өтті.

Ақпараттық-түсіндіру кездесулерінің негізгі мақсаты – тұрғындардың діни сауаттылығын арттыру, радикалды идеологиялардың ықпалына түсу қаупін төмендету және қоғамда тұрақтылық пен қауіпсіздікті нығайту. Мұндай профилактикалық жұмыстар тұрғындарға экстремизмнің белгілерін түсінуге, күмәнді ақпаратты ажыратуға және оның ықтимал қауіптері туралы дұрыс түсінік қалыптастыруға мүмкіндік береді.

Алматыда әртүрлі әлеуметтік орта өкілдерін қамтитын мұндай кездесулердің тұрақты өткізілуі діни экстремизм мен терроризмнің алдын алуға бағытталған мемлекеттік саясаттың маңызды бөлігі болып отыр.