Қазақстан ресми түрде шетелдік дәрігерлерден көмек сұраған жоқ – ДСМ

Қазақстан Республикасы коронавирус пандемиясымен күресу үшін ресми түрде шет елдерден дәрігер шақырмаған. Дегенмен, көмек қолын созып, елдегі жағдайды тұрақтандыру үшін үлес қосуға ниет білдірген шетелдік дәрігерлер болған. Бұл туралы бүгін Денсаулық сақтау вице-министрі Ажар Ғиниятқызы мәлім етті.

Індетке қарсы күресте дәрігерлермен бірге интерндер мен медициналық оқу орындарының соңғы курсында оқып жүрген студенттер де атсалысып жатыр екен.

«Қазір коронавируспен күреске 46 мыңнан астам дәрігер тартылған. Сондай-ақ, интерн дәрігерлер, жоғары курс студенттері де инфекциялық провизорлар мен емханаларда жүр. Ресми түрде халықаралық деңгейде шетелдік дәрігерлердің көмегіне жүгінген жоқпыз. Бірақ, көрші елдердің дәрігерлері бізге қатты көмектескісі келеді. Мәселен, кеше ғана Ресейден бір топ дәрігер келді. Біз достас елдердегі әріптестердің бұл көмегіне қуанамыз», - дейді Ажар Ғиниятқызы.

Сонымен қатар, ауруханалардағы төсек-орын тапшылығын жою үшін жекеменшік клиникалардың ресурсын пайдалану жоспарланып отыр.

«Жекеменшік емханалар да вируспен күреске тартылады. Денсаулық сақтау министрі олардың басшыларымен жиналыс өткізді. Реанимация бөлімшелері, адамды жатқызуға болатын кабинеттері бар клиника басшылары қазір Қормен (міндетті әлеуметтік сақтандыру қоры – авт.) келісімшарт жасауға дайындалып жатыр», - деп түсіндірді Ажар Ғиниятқызы.

Кенжекей Тоқтамұрат, Нұр-Сұлтан