Қасым-Жомарт Тоқаев Ирандағы ұшақ апатына байланысты көңіл айтты

Қазақстан Республикасының президенті Қасым-Жомарт Тоқаев Ирандағы украиналық ұшақтың апатқа ұшырауына байланысты көңіл айтты, деп хабарлайды Azattyq Rýhy Ақорда сайтына сілтеме жасап.

Мемлекет басшысы Иран астанасы Тегеран әуежайы маңында «Украина халықаралық әуежолы» компаниясы ұшағының апатқа ұшырауы салдарынан азаматтары қаза болған бірқатар ел басшыларына көңіл айту жеделхаттарын жолдады. 

Еске салсақ, 8 қаңтар күні Тегеранның Имам Хомейни атындағы әуежайынан таңғы сағат 6.12-де ұшып шығып, Киевті бетке алған ұшақ артынша апатқа ұшыраған. Ұшақ бортында болған 180 адам түгелдей қаза тапқан. Олардың 73-і Канада, ал 71-і Иран азаматтары болған. Тағы екі жолаушы мен экипаж мүшелері – украиналықтар. Қалған жолаушылар Германия, Ұлыбритания, Швеция және Ауғанстан азаматтары болған. Жолаушылар арасында қазақстандықтар болмаған. 

Украина президенті Владимир Зеленский әуе апатынан қаза тапқандардың отбасыларына көңіл айтты.