Тоқаев 21-22 желтоқсан күндері Ресейге барады

Президент Қасым-Жомарт Тоқаев 21-22 желтоқсан күндері Жоғары Еуразиялық экономикалық кеңестің отырысы мен ТМД-ға мүше мемлекеттер басшыларының бейресми кездесуіне қатысу үшін Санкт-Петербург қаласына барады. Бұл туралы Ақорданың баспасөз қызметі мәлімдеді, деп хабарлайды Azattyq Rýhy.

Айта кетейік, 17 желтоқсан күні Қасым-Жомарт Тоқаев Жапонияға ресми сапармен барды. Мемлекет басшысы Қасым-Жомарт Тоқаев Токио губернаторы Юрико Коикэмен кездесу өткізді. Сонымен қатар ол Жапониядағы сапары аясында Токионың Төтенше жағдайлар жөніндегі ахуалдық орталығын аралап көрді.

Токио губернаторы Юрико Коикэ Қазақстан президенті Қасым-Жомарт Тоқаев пен делегация мүшелеріне құрмет таныта отырып, қазақша амандасты. Сондай-ақ президен Токиода Жапонияның ірі және ықпалды сауда-инвестициялық корпорацияларының бірі саналатын Sumitomo жетекшісімен кездесті, 

Мемлекет басшысы Жапония металл және энергетикалық қауіпсіздік жөніндегі ұйымының (JOGMEC) төрағасы Ичиро Такахаруды қабылдады. Сонымен қатар Mitsui компаниясы директорлар кеңесінің төрағасы Тацуо Ясунагамен кездесті және Komatsu компаниясы директорлар кеңесінің төрағасы Хироюки Огаваны қабылдады.

Қазақстан президенті Қасым-Жомарт Тоқаев Токио қаласындағы Біріккен Ұлттар Ұйымы университетіне барып, «Дүрбелеңге толы дәуірдегі стратегиялық сенімді қалпына келтіру: әділетті әрі тұрақты әлем құру жолындағы Қазақстанның ұстанымы» тақырыбында дәріс оқыды және Тоқаев Алматыда БҰҰ университетінің өңірлік филиалын құруды ұсынды.