Жүз жастағы кейуана жаңа куәлігін алды (ВИДЕО)

ШҚО-да 100 жастағы кейуана жаңа жеке куәлігін алды, деп хабарлайды Azattyq Rýhy.

Жаңартылған құжатты ШҚО ПД көші-қон қызметінің қызметкерлері әженің туған күнінде табыстады.

«Зейнеткерлікке шыққанға дейін, жасының ұлғайғанына қарамастан, балалар жедел жәрдем бригадасының санитарлық қызметкері болып жұмыс істеген Өскемен қаласының тұрғыны Елизавета Прядко қонақтарды көтеріңкі көңіл-күймен қарсы алды», - деп хабарлады инспектор Шырайлым Ерікова.

Полиция қызметкерлері оған Қазақстан Республикасының жаңа жеке куәлігін тапсырып, зор денсаулық тіледі. Елизавета Прядко көші-қон қызметі бөлімінің қызметкерлерінің назары мен кәсібилігі үшін барлығына жылы лебізін білдірді.

«Біз Елизавета Прядкоға құжат алмасу бойынша өз көмегімізді көрсеткенімізге қуаныштымыз, өйткені мұндай жағдайлар күн сайын кездесе бермейді. Барлығымызға ұзақ өмір мен рух беріктігін тілеймін», – дейді инспектор.

Шығыс Қазақстан полициясының тарихында тәртіп сақшылары бұған дейін 100 жастан асқан 40-қа жуық азаматтың құжаттарын жаңартыпты.