Қазақстанда су айдындарынан 60 мың тонна қоқыс жиналды
«Таза су айдындары» экологиялық акциясы елдің барлық өңірінде өтті
Қазақстанда «Таза су айдындары» республикалық экологиялық акциясы аяқталды. Іс-шара барысында өзен-көлдер мен олардың жағалауларынан 60 мың тоннаға жуық қоқыс пен иесіз балық аулау торлары жиналып, жойылды, деп хабарлайды Azattyq Rýhy ҚР Ауыл шаруашылығы министрлігіне сілтеме жасап.
Акцияның басты мақсаты – елдің су ресурстарын сақтау, сондай-ақ ішкі су айдындарының экологиялық жағдайын жақсарту болды.
Акцияға 1000-нан астам адам қатысты
Шараға экология департаменттері мен жергілікті атқарушы органдардың өкілдері, студенттер, еріктілер және қоғамдық ұйымдар мүшелері атсалысты.
Балық шаруашылығының сегіз бассейндік инспекциясы (Тобыл-Торғай, Есіл, Нұра-Сарысу, Зайсан-Ертіс, Жайық-Каспий, Арал-Сырдария, Балқаш-Алакөл және Шу-Талас) акцияға белсенді қатысып, елдің барлық өңірлерінде тазалық жұмыстарын жүргізді.
Барлығы 1,1 мыңнан астам адам және 170 техника бірлігі, оның ішінде 59 су көлігі жұмылдырылды.
Су айдындары мен жағалаулар тазартылды
Акция нәтижесінде ондаған шақырым жағалау сызығы тазартылды, ал жиналған қоқыс арнайы орындарға жеткізіліп, өңдеуге жіберілді.
Мамандар мұндай экологиялық шаралар елдің табиғи байлығын сақтау мен экожүйені жақсартуға елеулі үлес қосатынын атап өтті.
